CALENDARIO: O ANO DOS SENTIDOS

Reunido o xurado formado por un membro do equipo directivo, un membro do persoal non docente, un do profesorado e un do grupo de biblioteca decide outorgar premio aos seguintes participantes: 

• 1ºPREMIO: Naiara (2ºESOC) por “Mirarte” 
• 2ºPREMIO: Uxía Alonso (2ºESOC) por “Ao revés”
• 3ºPREMIO: Marco Dorado (1ºESOA) por “Segredo"

E tamén recibirán un agasallo os seguintes participantes, xa que as súas fotografías forman parte do calendario do 2022.

• Anum Zahra (3ºESOPMAR) por “Serenidade”
• Iria (4ºESOB) por “Franqueza” 
• Unai (1ºESOA) por “Olfacto” 
• Nerea (2ºESINBE) por “Con(TACTO)” 
• Daniel (2ºESOA) por “Beleza” 
• Mohamed (4ºESOB) por “Sensacións” 
• TagenAta por “Recoller” 
• Uxía (2ºESOC) por “Sensacións” 
• Daniel (2ªESOC) por “ Sentidos” 

O alumnado de 1ºINFOFI, que axudou a que este calendario tivese o formato que desexamos para que estea en todas as aulas o ano 2022, recibirá o seu agasallo en agradecemento á súa colaboración e ao seu traballo.

AGARDÁMOSVOS A TODOS E A TODAS O DÍA 21 DE DECEMBRO DE 11.15H – 11.40H NO SALÓN DE ACTOS. 

Grazas por participar!!!

CONCURSO: A MELLOR ÁRBORE DE NADAL DA AULA E O MELLOR VÍDEO DE FELICITACIÓN

Reunido o xurado formado pola coordinadora das TICs, un membro do persoal non docente, un do profesorado e dous representantes do grupo de biblioteca decide outorgar premio aos seguintes participantes nas categorías de:

MELLOR ÁRBORE DE NADAL 

Para a AULA 12 – 3ºPMAR pola súa orixinalidade, o seu traballo persoal e as ilusións que amosaron na elaboración e o contido dos seus desexos.

MELLOR VÍDEO DE FELICITACIÓN 

Para os/as participantes de 2ºC pola ilusión, alegría e compañeirismo que amosan neste vídeo.

AGARDÁMOSVOS A TODOS E A TODAS O DÍA 21 DE DECEMBRO DE 11.15H – 11.40H NO SALÓN DE ACTOS. 

Grazas por participar!!!

---

O xurado dos concursos fixo entrega dos premios:

II TALLER DE RADIO CON SARA MEIJIDE

Hoxe asistimos ao segundo obradoiro de radio impartido por Sara Meijide. 

Deixámosvos unha mostra de todo o aprendido e do ben que o pasamos sentíndonos xornalistas. 

Pronto poderedes gozar  dos programas gravados e opinaredes. 

RADIO LLAMA, CON SARA MEIJIDE

O luns 13 de decembro, o equipo da radio escolar ("Radio Llama") tivemos a sorte de coñecer a Sara Fernández Meijide, xornalista da cadena SER, que comezou a descubrirnos os segredos desta canle de comunicación e os recursos que temos á nosa disposición para sacarlle o mellor partido á nosa radio. 

Sara comezou a familiarizarnos co equipo co que contamos...  

Conseguiu conectar tres micros para que así puideramos participar tres persoas nos programas de radio.

Falounos da "mesa de mezcla" que tiñamos e deunos un pequeno desgusto, xa que non era moi útil para os nosos proxectos. Pensaremos...

Logo de ver o equipamento co que contabamos recomendounos facer gravacións e traballalas antes de emitir o programa, porque se queriamos incluír música a unha entrevista ou a calquera información en directo non podiamos. Ensinounos o camiño que tiñamos que seguir tendo en conta o noso equipamento. Comezou por aprendernos o manexo do audacity, falounos do imprescindible que é respectar os dereitos de autor/a á hora de usar música, imaxes... e recomendounos algunhas páxinas. 

Continuou explicándonos como se realiza un podcast.

e sen máis, púxonos a FUNCIONAR! 

Comezou organizando tres equipos e lembrando as funcións de cada compoñente.

Preguntándonos que temas nos gustarían tratar no programa que imos gravar. 

Eliximos temas interesantes, pero que non imos desvelar agora porque os escoitaredes nos programas que compartiremos. 

Sara despediuse lembrando que levabamos traballo de investigación, porque na seguinte xuntanza tocaba gravar e  amosar que imos por bo camiño para dedicarnos ao xornalismo. 

Ata luns, Sara!

PREPARANDO O CALENDARIO, "O ANO DOS SENTIDOS"

Este ano, o concurso de fotografías e ilustracións para realizar o calendario, "O ano dos sentidos", demostrou que estamos unidos/as e que podemos comezar unha actividade e poñerlle fin entre todos e todas  nun ambiente de colaboración total.  Como? Moi fácil! Só hai que participar e, unha vez seleccionadas as fotos (aínda non se fixo público o veredicto do xurado -aí si que nós estivemos á marxe), axudar a darlle forma ao noso calendario, xa que estará en todas as aulas para o ano que vén e lembraranos moitos momentos. 

Participamos! E os/as nosos/as compañeiros/as de 1ºINFOFI comprometéronse a axudar na súa maquetaxe final e así o fixeron e están facendo porque custa moito. 

Fixádevos! 

- Coa axuda de Iris, deseñaron a portada do calendario, maquetaron todos os meses do ano (fixándose nos festivos...) coas fotografías elixidas e imprimiron 75 calendarios.

- Prepararon todo e organizaron o traballo para continuar o proceso. 

- Tere foi familiarizándoos coa perforadora para logo colocar a espiral. 

- Amodiño foron inseríndoa en cada calendario.

- O emprego do alicate para pechar a espiral resistiuse un pouco, pero.. 

- Parte do traballo está feito. Venres continuarán ata finalizalo e así poder ter os nosos calendarios. 

Grazas a todos e a todas por participar!

Grazas a todos e a todas por colaborar!

Pronto coñeceredes o veredicto final e poderedes gozar do noso calendario. 

DÍA INTERNACIONAL DAS PERSOAS CON DISCAPACIDADE

Hoxe, día 3 de decembro, a radio escolar ("Radio Llama") foi testemuña da lectura do manifesto que María (orientadora do centro e amiga) leu para a toda a comunidade educativa lembrándonos o DÍA DAS PERSOAS CON DISCAPACIDADE. 

Deixámosvos co audio no que escoitaredes a lectura do manifesto. 

PORQUE SUMEMOS TODOS E TODAS! 

RUTA ARTE URBANA CON GUIDO

Comezamos unha nova andanza da man de Guido, que nos acompañou durante cinco horas, dun día frío e non moi chuvioso, pola nosa cidade para ensinarnos ARTE e informarnos de moitos, moitos e moitos temas de interese que nos axudarán a comezar esta nova aventura aínda máis ilusionados/as. 

Ás nove da mañá chegou  Guido ("o noso amigo") ao instituto para comezar a ruta urbana.

Só nos quedaban cinco horas  percorrendo a pé a nosa cidade para descubrir todos os tesouros que temos de arte urbana en Lugo, porque a nova andanza d@s lector@s e andantes así o precisaba. 

Guido comezou a ruta, e nós seguímolo cos oídos e os ollos ben abertos ao longo de toda ela.

 

Aquí tedes algunhas fotos do día:

Ao longo da ruta, Guido respondeu a todas as nosas preguntas e ata contou coa colaboración, totalmente improvisada, de Sara e María para explicar o mito de Ariadna. 

Compartimos o vídeo que resume esas cinco horas que nos axudaron a seguir enriquecéndonos cultural e persoalmente no ambiente que caracteriza a Lecturas e andanzas I, II. 

Grazas Guido polas ensinanzas que nos transmitiches e por compartir este tempo con nós. Xa sabes que botaremos man de ti ao longo desta andanza que comezamos. 

Que andanza será? 

Se nos seguides, saberédelo!!!

25 NOVEMBRO, DÍA CONTRA A VIOLENCIA DE XÉNERO

  

Compartimos unha "breve" descrición de como fomos ideando e facendo ao longo deste mes para deixar ben claro que,  NON QUEREMOS MÁIS BÁGOAS! Se estades dispostos e dispostas, "ENTRADE, LEDE E MIRADE!"

Anum Zahra (3ºESO) realizou o deseño que colocamos por todo o centro. MOITAS GRAZAS, ANUM! 

Deseguido, María  e Jennifer F. (4ºESOA) deseñaron a chapa que repartiremos ese día entre toda a comunidade educativa. Como a maioría dos/das compañeiros/as coñeciamos a obra de Carlos Negro,  Penúlimas tendencias  lembramos uns versos deste poemario e aquí vedes o resultado. 

MOITAS GRAZAS, MARÍA E JENNI! Como este é un traballo compartido, tocaba facer as chapas e, "meu dito, meu feito". 

Aproveitamos os momentos libres

para rematalas a tempo. Grazas, Uxía, Naiara, Violeta e a  moitas máis mans que axudaron.

Tocaba seguir colaborando e pensamos en redactar haikus cos substantivos e adxectivos cos que nós, alumnos e alumnas de 1ºESOA e 2ºESOA, definimos este tipo de violación. 

Se premedes na imaxe podedes acceder aos textos. 

E puxémoslles voz!!

Os/as compañeiros/as de 3ºESOB/PMAR realizaron murais amosando o seu enfado ante esta situación. 

Pouco a pouco o centro ía sendo testemuña da nosa implicación.

Tocaba "interpretar". O primeiro vídeo que gravamos está baseado en poemas de Penúltimas tendencias de Carlos Negro. Seguindo os poemas, creamos unha historia que reflicte a quen NON queremos as mulleres; que deixase claro que un NON, é UN NON! e lembrar que as mulleres somos fortes para repetir, mil e unha vez, o que QUEREMOS  e ESIXIMOS: RESPECTO E IGUALDADE!

Nesta gravación participaron as nosas compañeiras de 4ºESOA (María, Jenni F., Sara R., Sara e Aitana) e as profesoras Marta e Rocío. 

Grazas a todas pola vosa implicación e a María, tamén,  pola montaxe e edición do vídeo, que poderedes ver ao final desta entrada. 

Seguindo a recomendación de Elena, puxémonos a ler Somos las nietas de las hijas que no pudisteis quemar, de Ame Soler e decidimos facer unha adaptación dunha parte desta obra. Tocaba buscar actores e actrices. Ningún problema! Os protagonistas serían Elena (profe) e Iván (profe), e o alumnado de 3ºESOA interpretarían os personaxes "secundarios". 

Deixámosvos cos protagonistas da gravación que poderedes ver ao final da entrada. 

MOITÍSIMAS GRAZAS A TODOS A TODAS!

Había que continuar e así o fixemos. As compañeiras de 1ºESBE escribiron este poema, que agardamos vos guste tanto coma a nós. 

E amosaron o dominio da maquillaxe, tal e como vemos nas seguintes fotos.

GRAZAS!!! 

1º e 2ºESINBE expresaron os seus pensamentos sobre este día do seguinte xeito. 

O alumnado de 2ºESTBEL non dubidou en achegar a súa contribución a este día. Fixádevos nas seguintes imaxes. 

Antes de despedirnos, agradecer a todos e todas a colaboración, e queremos  lembrar o traballo dos/as responsables de "Radio Llama" por poñer voz ao longo dos recreos  a todo o que se ía realizando.  

Para finalizar esta "breve" introdución, deixámosvos co vídeo que reune as actividades realizadas ao longo deste mes e amosan o NOSO COMPROMISO. 

O IES MURALLA ROMANA DI BEN ALTO:

NON MÁIS BÁGOAS!

"NUNCA ME PINTES COSTURAS NOS LABIOS" ( Carlos Negro)

Calendario - O ano dos sentidos

Ligazón para ver directamente o cartel en Canva

NO CURSO 2021_22 SEGUIMOS MEDRANDO COAS LECTURAS E ANIMÁNDOVOS A LER!

Aquí seguimos facendo o que nos gusta: LER E COMPARTIR! 

Para facilitarvos a escoita das nosas opinións sobre as lecturas creamos esta nova entrada, aínda que vos lembramos e aconsellamos premer na etiqueta "As nosas lecturas" deste blog para escoitar moitas máis recomendacións que, seguro,  vos axudarán a medrar dun xeito gratificador. 

Comezamos!

Iria (1ºESOA) comparte a súa opinión sobre a lectura de A folla azul da autora Andrea Maceiras. 

Carme (2ESOA) achega a súa opinión sobre a obra de Care Santos, Verdade.

Antía (2ºESOA) fálanos do cómic Subnormal realizado por Miguel Porto e Fernando Llor baseado  na historia de acoso que sufriu o baloncestista Iñaki Zubizarreta. 

Agora é Elsa (2ªESOA) quen achega a súa opinión sobre o mesmo cómic.  

Violeta (2ESOA) comparte a súa opinión sobre a obra de Andrea Maceiras, O que sei do silencio. 

Unai (1ºESO) achega a súa opinión sobre a obra de Eva Mejuto, Memoria do silencio e anímavos a lela. 

Diego (2ºESO) comparte a súa opinión sobre a mesma novela de Eva Mejuto, Memoria do silencio. 

Marco (1ºESOA) comparte a opinión sobre a lectura da obra de Andrea Maceiras, Volverás golfiño. 

Miguel (1ºESOA) achega a súa opinión sobre a obra de Miguel Ángel Alonso Diz e Luz Beloso, A nena á que non deixaban ser feliz. 

Violeta (2ºESOA) opina sobre Cartas de inverno de Agustín Fernández Paz. Seguro que, ao escoitar o seu audio, vos animades a ler esta obra. 

Diego Alejandro (1ºESOA) fala dunha das obras da literatura universal, A illa do tesouro de Robert Louis Stevenson. 

Seguindo con aventuras e con novelas "universais", aquí vos deixamos coas opinións sobre a obra Robinson Crusoe de Daniel Defoe nas voces de:

 

SANTI (1ºESOA)

 

E de UNAI (1ºESOA)

 

Seguimos lendo e compartindo opinións para animarvos a vós.  Iria (1ºESOA) achega a súa opinión sobre a obra de Ledicia Costas, A balada dos unicornios. 

Dani (1ºESOA) resume a obra de Pepe Carballude, De como o Santo dos Croques se fai peregrino. 

Marco (1ºESOA) dá a súa opinión sobre a obra de Antía Yáñez, O misterio de Portomarín para animarmos a súa lectura. 

As seguintes recomendacións animaranvos a ler poesía. Deixámosvos con Taha (2ºESOA) que dá a súa opinión sobre o poemario de Carlos Negro, Makinaria.  

Elsa (2ºA) opina sobre a lectura de Street poems de Fran Alonso. Agardamos que esta obra nos abra camiño para continuar o comezado polo club de lectura. 

Volvemos á narrativa da man de Carme (2ºESOA) que nos anima a ler Europa Express de Andrea Maceiras. 

Antía (2ºESOA) achega a súa opinión sobre Tristes armas de Marina Mayoral. 

Édgar (2ºESOA) dá a súa opinión sobre a obra lida pola súa compañeira Antía. Agardamos que vos vaiades animando a lela. 

Chaimae (2ºESOA) opina sobre os relatos de O neno can, obra escrita por Fina Casalderrey e Francisco Castro. 

Diego (2ºESOA) dános a súa opinión sobre a obra de Agustín Fernández Paz, Noite de voraces sombras. 

Santiago (1ºESOA) achega a súa opinión sobre a obra de Eva Mejuto, Memoria do silencio. Agardamos que vos animedes a lela. 

Unai (1ºESOA) fálanos da obra de Valentín Alvite, Antía e Daren. O misterio dos torques roubados. Non esperedes máis e comezade a lela. 

Por se tiñades dúbidas, aquí vos deixamos coa opinión de Marco (1ºESOA) sobre a mesma obra. 

As palabras  e a opinión que nos achega Santi (1ºESOA)  sobre esta mesma obra acabarán por animarvos a lela. 

Daniel (1ºESOA) dános a súa opinión sobre o cómic de Paco Roca, Engurras. 

Sandra (1ºESOA)  fálanos da obra de Ledica Costas, Os minimortos. Benvidos ao outro barrio. 

Sandra (1ºESOA) fálanos, nesta ocasión, da  lectura de Palabras de caramelo, escrita por Gonzalo Moure. 

Agora é Maryam Nazar (1ºESOA) a que nos dá a súa opinión sobre a mesma obra de Gonzalo Moure. Agardamos que vos animedes a lela. 

 

E Zeltia (2ºESO A) segue animándonos a ler esta obra de Gonzalo Moure. Deixámosvos coa súa recensión. 

Alicia (2ºESOA) achega a súa opinión sobre Palabras de caramelo.

Continuamos lecturas, agora Juan Luis (1ºESOA) comparte con nós a súa opinión sobre a obra de Pilar Serrano e Jorge Campos, Unha mestra en apuros. Sálvese quen poida. 

Diego Alejandro (1ºESOA) comparte a súa opinión da obra, Unha mestra en apuros. Isto é outro mundo de Pilar Serrano e Jorge Campos. 

Sheila (1ºESOA)  achéganos un resumo da obra de Bárbara Cantini, Mortiña. Un curmán repugnante. 

Continuamos coas lecturas O Pacto do letargo e A afogada

Nas sesións desta semana continuamos mergullados e mergulladas nas historias dos nosos libros. 

Lecturas e andanzas II con O Pacto do Letargo de Miguelanxo Prado

E Lecturas e andanzas I coa obra A Afogada de Rocío Leira.

Proximamente escoitaredes as nosas opinións na radio escolar, Radio LLama.

ANIMÁDEVOS A COMEZAR ESTAS LECTURAS, RECOMENDÁMOLAS!  

COÑECÉNDONOS NO CURSO 2021_2022

Un curso máis seguimos co obxectivo comezado hai anos. Que mellor que compartir uns momentos para coñecernos un pouquiño máis!!! 

Este curso abren a sección de entrevistas, Diego e Daniel (1ºESOA), que elixiron a Jose (profesor de plástica) para facerlle as preguntas que nos achegarán máis a el a a moitos temas. 

Deixámosvos coa entrevista. 

Se queredes coñecer un pouco máis a Marta, profe de historia, non deixedes de escoitar a entrevista que lle fixeron as alumnas de 1ºESOA, Sandra, Iria e Sheila. 

Unai e Santi (1ºESOA) entrevistan a Cintia, profe de matemáticas que imparte, tamén, educación física. Aquí vos deixamos coa entrevista. 

Sabela e Maryam (1ºESOA) entrevistan a súa profe, Patricia. Que pasedes uns bos momentos escoitándoas!

E CHEGOU O SAMAÍN

Chegou o día e chegou a romaría!

Rematamos de decorar a biblio 

e espazos moi próximos

para gozar desta festa. 

En Radio Llama, os/as nosos/as compañeiros/as de 3ºPMAR lembraron as orixes desta celabración realizando uns carteis e poñéndolle voz á información recompilada. 

Deixámosvos co audio. 

Alumnos e alumnas de 2ºESO contaron o relato, "Sobre a morte do Bieito" de Rafael Dieste. 

Alumnado de 1ºESOA achegou as súas creacións persoais sobre esta celebración

E celebrámolo coas súas coplas: 

Os/as nosos/nosas compañeiros/as de 1º e 2ºESBE preparáronse para o día. Se queredes algunha idea para maquillaxe ou uñas..., só tedes que premer aquí. 

Agora toca... 

TRUCO OU TRATO !!!