LECTURAS CON COMPROMISO

 No mes de xaneiro estivemos lendo o libro Neko de Eva Mejuto, é un libro curtiño e fácil de entender; e a nós gustounos moito. 

Toca un tema que supón unha lacra para a nosa sociedade como o é a violencia de xénero; a medida que iamos lendo iamos reflexionando sobre o  impacto que ten  estan violencia on só  na vida das mulleres  senón para a familia enteira, sobre todo para os nenos como é o caso da protagonista do libro, Xoana. Esta nena fainos ver desde os seus ollos que comportamentos que a miúdo se normalizan son en realidade comportamentos violentos contra persoas moi cercanas.

Tamén este libro nos levou a reflexionar sobre dous puntos máis: a existencia doutras mulleres dispostas a axudar  ás outras que o están a pasar realmente mal e o apoio de mascotas que son moito máis que animais de compañía como o caso de Neko, o canciño que ó o gran confidente de Xoana.

Que este libro se titule Neko fainos entender a importancia dos animais; isto levounos no club a falar das nosas mascotas, da importancia que teñen para nós; da importancia de cuidar dos animais e de toda a natureza en xeral. E relacionda con este tema estabamos preparando unha saída do centro moi emocionante da que vos daremos conta na próxima publicación. 

Libro Neko de Eva Mejuto

Momentos do club de lectura

 Momentos do club de lectura

FOTOS CALENDARIO

O noso centro, conmo cada curso, celebrou un concurso para o calendario do  ano 2026 co lema "Sabedoría popular". Os participantes deberían achegar unha imaxe (foto ou debuxo) orixinal relacionada con algún dos meses acompañada dun refrán tamén alusivo a ese mes. 

Desde o club de lectura estivemos conversando das imaxes que tiñamos e coas que queriamos participar e, por outra banda, estivemos buscando refráns acaídos para o que queriamos expresar. 

Houbo tres imaxes premiadas e logo foron seleccionadas outras nove imaxes  para completar todos os meses do ano. Dentro destas imaxes seleecionadas estiveron a de dúas membros do club de lectura, Firdaousse e Antía, ás que lles queremos desde aquí dar os parabéns e dicirlles que cando cheguemos aos meses de xulo e decembro, ao mirar o noso calendario, lembrarémonos delas. 

Aquí están as imaxes xa montadas no calendario, 

Foto de Firdaousse

Foto de Antía

AS NOSAS REFLEXIÓNS NO 25N

 O EDLG e o club de lectura  estivo preparando unha actividade para commemorar o 25N e facernos reflexionar sobre a falta de igualdade entre homes e mulleres aínda hoxe en día. 

Preparouse previamente o Taboleiro da lingua con imaxes relacionadas con este día e o co lema "NON ESTÁ BEN". Logo o 25 de novembro diferentes grupos nas clases de Lingua fixeron reflexións sobre a falta de igualdade entre os dous xéneros, sobre o machismo e micromachismos,  sobre os teitos de cristal,  as relacións tóxicas de parella... con estes temas sobre a mesa, a rapazada fixo as súas propias reflexións nunha folliña de papel e logo puxéronas no taboleiro. @s membros do club tamén fixeron as súas aportacións.

Nas imaxes vemos o grupo de 3º ESO PDC colocando as súas reflexíóns no taboleiro.

Grazas a tod@s pola vosa implicación e por deixar patente que seguimos andando camiño á igualdade real, pero aínda quedan pasos por dar. 

VISITA DE LOIS PÉREZ

 O pasado 5 de novembro estivo no noso centro o autor lucense Lois Pérez con motivo da presentación do certame Enredando co galego 2025. Foi unha sesión moi amena na que o autor, tocando cunha guitarra creada por el cunha lata de aceite, estivo cantando e recitando poemas do seu libro Lugo Philadelphia e aproveitou para contarnos a súa viaxe a Estados Unidos e as experiencias alí vividas que deron lugar a este poemario. 

Grazas, Lois, foi un pracer que nos fixeras partícipes das túas creacións!

OS NOSOS ENREDOS

O club de lectura anda a preparar unha nova actividade relacionada coa lectura. 

Nalgunhas sesións estamos a ler en voz alta e coa entoación debida contos publicados en galego. Na sesión á que pertencen as fotos estamos a ler Corre  corre, cabaciña, un libro que trouxo Antía (xunto con algún máis) pertencente á súa biblioteca persoal. 

Andamos a argallar algo do que máis adiante vos daremos noticias, xa que aínda estamos perfilando o tipo de actividade que imos facer e para que público.

Xa vos seguiremos contando....!!!

DOCES DE SAMAÍN

O xoves 30 de outubro celebrouse o Samaín no noso centro, unha das actividades promovidas polo EDLG e a biblioteca nas que partcipamos @s membros do club de lectura,  foi a de traer doces "terroríficos" mais as receitas escritas en galego. Aquí vos deixamos as fotos para que vexades a pinta que tiñan!

Nós non só participamos senón que unha das nosas "lectoras", Amani, levou un premio outorgado por un xurado formado por profes e alunmnado de FP Básica. Como ese día coincidía cunha sesión do club de lectura, no tempo de lecer fomos á biblioteca á entrega de premios e logo á aula onde nos reunimos o club e estabamos tan contentas polo premio de Amani que quixemos inmortalizar o momento cunhas fotos. 

Con actividades coma esta lógrase implicar ao alumnado e a fortalecer vínculos, aproveitando ademais a celebración dunha tradición galega, que pouco a pouco imos recuperand,o como é o Samaín (aínda que sexa con influencias do Halloween americano).

Non podemos esquecer que temos tradicións propias que coñecer e valorar!

VISITA DE IVET NÚÑEZ

O 28 de outubro o club de lectura de adultos tivo unha visita moi agardada: a da escritora Ivet Núñez. 

Trátase dunha autora de novela negra que soe situar a acción das súas historias en Lugo, é o que sucede no seu libro Los oiréis sufrir que nesta ocasión foi a lectura proposta para o club e supuxo un alicente máis para adentrarse nas súas páxinas

Tod@s @s integrantes do club quedaron impresionadas co libro, co engaiolante que resultou ser a súa lectura e o lograda que está a atmosfera e os personaxes desta novela, a pesar de estar escrita por unha autora moi xoven. 

Compartimos con ela as nosas impresións sobre a obra e fixémoslle algunha que outra pregunta sobre curiosidades dela como autora e da novela. 

Foi unha sesión moi frutífera que rematou co agasallo dunha camiseta a Ivet (que dixo que lle gustara moito) e da sinatura de exemplares do libro por parte dela.

Deixámosvos algunhas fotos deste  emocionante encontro. 

Moitas grazas, Ivet por acompañarnos e acercarnos ao acto creativo literario!