Encantounos a actividade que promoveu a Asociación de Escritoras e Escritores en Lingua Galega (AELG) e decidímonos a plantar os #SementadePensamentos (Pena de non telos cando os fomos comprar, pero estarán).
Sementamos durante días lembrando a semente que plantara Rosalía de Castro e paseniño fomos facendo que foran visibles en todos os espazos do centro, e en todos os nosos corazóns, as ilusións que nos facía mover a nosa Rosalía.
"Dándolle reviravoltas
cal fan aqués que non saben...
fomos rematando o mural dos nosos pensamentos, das nosas palabras para lembrar a Rosalía, á nosa Rosalía, á nosa PRECURSORA.
 |
Tocaba o tempo de darlles voz ás súas palabras e decidimos comezar, á primeira hora da mañá, lendo poemas de Cantares gallegos e Follas novas nas voces do alumnado de 2ºESO. (Agardamos poder compartir os audios das súas lectura o máis pronto posible.)
No tempo de lecer, compoñentes do club de lectura leron o manifesto de Beatriz Maceda Abeleira (AELG) para lembrar que a NOSA ROSALÍA SEGUE EN NÓS.
Seguiron outras voces... pero será mañá, 24 de febreiro.
"Din que non falan as plantas,
nin as fontes, nin os paxaros,
nin a onda cos seus rumores,
nin co seu brillo os astros.
Dino, pero non é certo...."
PORQUE TI SEMPRE NOS FALAS, ROSALÍA!!!
Aquí van pensamentos e ilusións, grazas a ti.
Para despedirnos por este ano, deixámosvos co poema que pecha Cantares Gallegos, elixido por Sara para o recital poético.
