REUNIÓNS DO CLUB DE ADULTOS

Nós reunímonos na hora do lecer os martes e mércores todas as semanas para facer diferentes lecturas e charlar facendo reflexións sobre os diferentes libros e cómics que lemos. 

O grupo de adultos tamén está desfrutando moito coas lecturas, eles reúnense pola tarde, ás 20:00 os último luns de cada mes. 

Xa levan lido Cabalos e lobos de Francisco Pérez Lorenzo  e La educación física de  Rosario Villajos. 

A seguinte lectura que comentarán será La biblioteca de fuego de María Zaragoza. Nesa reunión estará tamén presente, mediante videoconferencia, a propia autora... xa vos iremos contando!

UN DELICIOSO SAMAÍN

Este ano o EDLG e o equipo de biblioteca propuxo para celebrar o samaín un concurso gastronómico relacionado con esta festa, tratábase de traer pratos (sobre todo doces) relacionados coa temática do medo e do terror, xunto coa comida tamén debía aparecer a receita usada para elaborar tan "terroríficos" pratos. 

O club de lectura tamén se sumou á celebración, así que o xoves 31 de outubro fomos á biblioteca a formar parte do público que degustaba os pratos, incluso un rapaza do noso club se animou a participar cunha torta. 

Parte integrante do club de lectura na degustación do Samaín

Aquí vos mostramos algún dos doces feitos para o concurso do Samaín, estaban realmente moi "currados".

Parabéns a tod@s @s participantes! Así dá gusto celebrar esta data!

BENVIDOS A UN NOVO CURSO!

 Perdoade a tardanza en facer a primeira publicación deste curso. 

O certo é que xa levamos lendo todo o trimestre. Estamos lendo o libro Alma de grilo de María García coa que moi axiña imos ter unha sorpresa. 

Estanos gustando moito... sobre todo estamos sacándolle moito zume e os seus relatos dános para moitas "discusións", debates e, sobre todo, reflexións. 

Xa vos iremos contando máis cousiñas!!!!

Alma de grilo: o noso primeiro libro deste ano

Mesa de lectura e coloquio

RUTA LITERARIA POR RIBADEO

 Rematamos as nosas andanzas este curso cunha saída a Ribadeo. 

O día 20 de xuño os membros do club de lectura, os colaboradores de Radio Llama e os bibloaxudantes achegámonos ata a Mariña Lucense para rematar cun día distendido o noso labor durante todo o ano. Fomos primeiro á praia das Catedrais, pero estaba un día moi malo, non paraba de chover! Así que baixamos do autobús e volvemos entrar porque non puxemos pingando. 

Achegámonos entón ata Ribadeo e alí, que milagre! deixou de chover e puidemos facer unha ruta polos lugares máis coñecidos de Ribadeo, sobre todo aqueles que están relacionados co último libro que lemos no club: A gruta da Torre de Lois Pérez, levamos unha pequena decepción ao ver tapada a torre dos Moreno por obras, pero o paseo pagou a pena. Tamén baixamos ata o porto e desde alí fixemos un pequeno percorrido en barco pola ría con explicacións do patrón do barco, que ben o pasamos!

Cando rematamos, xa era hora de xantar; así que tivemos un rato de tempo libre para facelo e desfrutar libremente da vila de Ribadeo. 

Ás 15:30 saímos cara a Lugo, pero non podiamos marchar sen facer unhas últimas paradas; primeiro na praia das Catedrais, agora non chovía pero non puidemos baixar pasear por ela porque a marea estaba alta, pero si que a vimos desde arriba e pareceunos unha marabilla. 

E non podiamos volver a Lugo sen darnos un pequeno baño no mar... o día parecía que non convidaba moito, pero as gañas de gozar coas ondas puideron con todo... así que bañáronse os que así o desexaban (a maioría), despois secámonos, desfrutamos un anaquiño máis da praia e aproveitamos para merendar. 

Logo desta intensa xornada, collemos rumbo a Lugo a onde chegamos sobre as 20:00 h da tarde.

Foi unha gran experiencia para rematar o curso!!! 

Desde aquí aproveitamos para desexarvos unhas felices vacacións. Gozade do verán!!!!

Foto de grupo no porto de Ribadeo

Navegando pola ría de Ribadeo

GALA FINAL DO "ENREDANDO CO GALEGO"

O mércores 12 de xuño desfrutamos da gala final da iniciativa "Enredando co galego”. En primeiro lugar, Grande Amore animou o público asistente. A segunda parte da gala consistiu nun sorteo de 2 lotes de libros e unha tableta por instituto. No noso caso, foron afortunados/as Yago de 2ºA, Narges de 3ºB e Sofía de 2ºB.

Por último,o xurado destacou a variedade de traballos presentados: relato breve, podcast, conto, poemas, vídeos, composicións plásticas...que se publicaron nas redes sociais co cancelo #enredandocogalego ou na páxina web da AELG. O terceiro premio foi para Celia Rodríguez de 1º BAC, o segundo para Sara Pico de 1º BAC e o gañador foi Eric de 2º ESO B polo relato "Ola, son Pedro". Ademais, o xurado destacou os textos de Martín Vila "Cantiga de amigo", os poemas de Yasmin  e o podcast recomendando unha lectura de Violeta, tres estudantes de 4ºESO.

Parabéns polo voso compromiso e pola vosa creatividade!

Participantes diante do auditorio Gustavo Freire

Gañadores do noso centro

AS LETRAS GALEGAS CON MÚSICA EN RADIO LLAMA

 Ademais de todos os actos que houbo conmemorando o Día das Letras Galegas no noso centro, o equipo de Radio LLama quixo unirse tamén a tan importante celebración e para iso creou un podcast no que se fai unha breve introdución sobre quen foi Luísa Villalta para dar logo a diferentes versións musicadas de poemas da propia Luísa Villalta e de Rosalía de Castro... dúas figuras sobresaíntes da historia da nosa literatura.

Durante toda a a semana do 17 de maio puídose escoitar esta selección musical nos corredores e no patio do noso centro... así con música en galego foi unha boa forma de celebrar as semana das nosas letras.

Deixámosvos aquí o programa para que o escoitedes!

CELEBRANDO A LUÍSA VILLALTA

Este ano o Día das Letras Galegas estivo dedicado a Luísa Villalta, que foi profe de Lingua Galega, ademais de autora prolífica de diferentes xéneros literarios en galego.

Un ano máis quixemos celebrar no noso centro este gran día e homenaxear a esta polifacética autora. 

Durante o mes de maio xa se estivo facendo traballos sobre a autora homenaxeada, para iso o alumnado de 2º ESO A fixo uns lapbooks nos que, ademais de facer unhas vistosas decoracións, puxeron información relativa á vida de obra de Luísa Villalta. Estes foron expostos no taboleiro de Dinamización Linguística. 

Taboleiro do EDLG cos lapbooks sobre Luísa Villalta

Comezamos a semana das Letras con actividades na biblioteca. O luns realizamos a actividade "Deconstruíndo a Luísa Villalta", empregando recortes de versos da autora creamos novos poemas que logo expuxemos na cortiza principal, xunto coa exposición que había sobre a escritora na cortiza prinicipal.

Ao día seguinte, no lecer, tivo lugar un Kahoot tamén na bibioteca sobre a biografía da homenaxeada, que gañou o equipo de Walid, Malena e Moraima. Tamén houbo agasallos para o segundo e terceiro posto!

O 15 de maio, desfrutamos dun recital-concerto en homenaxe a Luísa Villalta. Puidemos escoitar poemas da autora da man de alumnado de 1ª, 2ª e 3ª  ESO, recitado acompañado de música interpretada por Violeta Fraga Sal de 4ª ESO B ao saxo e Carlos do ciclo DAM aos teclados. Neste acto recitáronse partes das obras O oco da palabra, Música reservada, En concreto e Ruído.

Como peche, os presentadores Rafa de 3ª ESO e Carla de 4º ESO reivindicaron o uso da nosa lingua non só neste mes, senón os 365 días do ano.